Coral Polifonica de Ribadeo

Un concerto SOBRESAÍNTE

2012-01-08T08:58:00.000-08:00

Rematou o ano 2011 e fíxoo, como de costume, co Festival de Panxoliñas, este xa na XVII edición.
Acompañaron á coral, nesta ocasión, as corais "A Pombiña" de Pedroso-Narón, a Coral de Valdoviño e o Coro Sagrado Corazón (que vén de gañar o 1º e 3º premios nas categorías infantil e xuvenil no Certame de Panxoliñas de Escolas Católicas en Santiago).

A Coral e o Coro tiñan preparado un concerto especial, como veñen sendo sempre estes concertos de panxoliñas, e as expectativas cumpríronse aínda por riba do esperado.
Os temas "Cantémoslle ó Neno, Happy Christmas e o bolero de Navidad" pero sobre todo as estreas da "Suite Comercial Navideña" (que repasa os jingles de famosos anuncios navideños) e o "Hallelujah" de Leonard Cohen (coas voces fermosas e emotivas das rapazas Carmen Rodríguez e Mercedes Awad) puxeron sorrisos e bágoas, tanto no público como nos coralistas (80 voces entre as da Coral e o Coro).

O cansancio dos últimos ensaios, acentuado nestas datas, sobre todo por parte dos coralistas máis novos cos exámenes escolares, merecen a pena a xulgar pola satisfacción que todos experimentamos tanto pola interpretación como pola emoción que soubemos transmitir ó público que nos acompañou e que cos seus aplausos e felicitacións puxeron máis calor ás nosas voces nunha fría noite de Nadal.
Felicidades a todos os coralistas que fixeron posible este fermoso concerto e graciñas a todos os que nunha ocasión máis nos acompañastes para vivir e soñar a música.

Cun doce canto de Paz.

Feliz 2012

FESTIVIDADE DE SANTA CECILIA

2011-11-26T14:42:00.000-08:00

Despois dunha parada periodística ou bloguística, que non musical, reanudamos a información sobre a nosa coral.
Foron estes dous meses de ensaios ininterrumpidos desde o último comunicado, alá no mes de setembro.
A misa da patroa puxo fin a un verán ateigado de actuacións, todas elas musicalmente satisfactorias e mesmo sobresaíntes e iniciou un outono tranquilo en canto a actuacións, dedicado a preparar o Festival de Panxoliñas e as actuacións en La Caridad do pasado día 19 de novembro, e en San Cibrao, o próximo día 8 de decembro.

Mañá día 27 de novembro, a Coral celebrará a festividade da Patroa da música con unha misa, á 1 da tarde, na Igrexa Parroquial e a comida que reunirá, no Parador de turismo, a preto dun centenar de persoas: coralistas, familiares, amigos, Membros de Honor e representantes do Concello.
Este ano non foi posible contar co concerto coral que tradicionalmente precedía a esta celebración, a pesar da veintena de corais (de distintas comunidades) coas que a directiva contactou.
Esta espera fixo que a Coral tivera que renunciar a 2 actuacións: en Santiago e no Festival de Habaneras de Cudillero.

O DÍA DA PATRONA

2011-09-07T10:48:00.000-07:00

O día da Patrona, ás 12 da mañá, a Coral cantará a misa solemne, como vén facendo dende o ano 1960, ano no que se levantou a prohibición eclesiástica que impedía que coros mixtos cantaran nas celebracións relixiosas.
A gaita e o órgano da peza “O son das campás”, a Misa de Angelis, Cantate Domino, Coral da Cantata 147, Signore delle cime ( co grupo Arco-Vento) e o grandioso Laudate Dominum, soarán na Igrexa Parroquial, na honra de Sta. Mª del Campo.

XVII FESTIVAL DE HABANERAS “RÍA DE RIBADEO”: UN NOVO ÉXITO.

2011-09-07T10:42:00.000-07:00

A coral “Amanecer” de Gijón e a Coral del Centro Asturiano de Avilés acompañaron á Coral de Ribadeo neste novo certame de habaneras, que a Coral organiza coa colaboración da Delegación de Cultura do Excmo. Concello.
O festival, un ano máis, foi un éxito, tanto de público, que empezou a congregarse ás portas do Auditorio dende máis dunha hora antes do inicio, como de crítica.
A Coral estreou, nesta ocasión, a habanera de Prudencio Romo “Contos do mar” e a canción filipina “Rosas Pandan” que gustaron moito.

Un pequeno descanso

2011-08-18T04:23:00.000-07:00

Coa actuación en Pontedeume, no VIII Festival de Habaneras, rematamos as actuacións do mes de xullo, un mes cheo de compromisos musicais do que nos queda un balance moi positivo, tanto no aspecto musical e de satisfación propia como emotivo:

-A actuación en Bueu, adicada ó mar, que conectou fondamente co público e na que a Coral soubo transmitir eses sentimentos que se agochan entre os pentagramas.

- A emocionante “Salve Marinera” o día do Pregón do Carme.

-O concerto adicado á música de cine ( Música… de Película), no Cine Teatro de Ribadeo, un espectáculo visual e sonoro que aunou as imaxes cinematográficas coas melodías máis representativas deses filmes, e polo que a Coral recibiu todo tipo se parabéns.

-Da actuación en Pontedeume destacamos os comentarios positivos á variedade do repertorio e á beleza de pezas como”Cançao do mar “.Como anécdota, sinalar que tivo que dirixir a última peza o coralista Hugo García, por problemas no escenario, mentres a directora acompañaba ó órgano á Coral.

Neste mes, os ensaios non están de vacacións, aínda que si as actuacións, xa que só se actuará no XVII Festival de Habaneras, o día 27 de agosto, ás 8:45 no Auditorio Municipal.

MÚSICA…..DE PELÍCULA

2011-07-13T04:27:00.000-07:00

Concerto da Coral Polifónica de Ribadeo, o próximo día 22 de xullo

A Coral ofrecerá, o próximo venres 22 de xullo, un concerto que servirá como peche do curso de verán “A Torre dos Moreno e a arte do seu tempo”.
Nesta ocasión, a Coral ofrecerá un concerto con temas de películas, dende as clásicas “Desayuno con diamantes” ou “ El álamo” ata outras máis recentes como “Los chicos del coro” ou “ Mar adentro”.
As interpretacións irán acompañadas da proxección de fragmentos das películas correspondentes, un concerto visual e sonoro que a Coral xa fixera no ano 2007 e que desexaba volver interpretar.

Próximas actuacións

2011-06-07T09:16:00.000-07:00

27 de maio - Ribadeo: Congreso da Sociedade Galega de Pediatría.

25 de xuño - Narón

26 de xuño - Ribadeo (Misa de Corpus)

9 de xullo - Bueu

16 de xullo - Ribadeo: Pregón das festas do Carme

22 de xullo - Ribadeo: Curso de verán da USC: A Torre dos Moreno e a arte do seu tempo: Emigración, patrimonio cultural e restauración.

30 de xullo - Pontedeume

Agosto - Ribadeo: XVII Festival de Habaneras

A Coral regresa de Marbella

2011-05-22T08:12:00.000-07:00

Tras unha longa pero agradable e fructífera viaxe de 4 días, a Coral regresou de Marbella
O concerto foi un éxito, a xulgar polos aplausos, vítores e comentarios do público que se deu cita no Teatro Cidade de Marbella, o domingo 15 de maio.

Entre o público estaban, o anfitrión e membro de Honor da Coral, Cándido Fdez. Ledo, representantes do Concello marbellí, o director da Coral Nª Sª de la Encarnación (á que a Coral adicou unha obra por estaren a celebrar o seu XXV Aniversario) e familiares e amigos da Coral, residentes na cidade e mesmo chegados de Almería, Cartagena e San Fernando.

No concerto non faltaron as habaneras e zarzuelas, a música galega, hispanoamericana e de películas, e mesmo unha lembranza en solidariedade co pobo murciano coa interpretación de Amazing Grace.

Ó remate da actuación, o Presidente da Coral entregou a Cándido Fdez. Ledo unha foto aérea de Ribadeo, xentileza de Foto Miguel, que Cándido agradeceu emocionado, agradecemento que fixo extensivo ós coralistas por estaren de novo en Marbella.

A Coral quere manifestar dende estas liñas o seu profundo agradecemento pola nova oportunidade que tivo de poder realizar este concerto, un premio ó traballo e ensaios, e por tódalas atencións dispensadas ós seus membros durante a estancia en Marbella.

Viaxe a Marbella

2011-05-11T06:50:00.000-07:00

O próximo sábado día 14, a Coral desprazarase a Marbella, onde actuará o domingo, 15 de maio, ás 8 da tarde no Teatro Cidade de Marbella, invitada pola fundación José Banús.

Esta é a terceira vez que a Coral actúa na cidade andaluza, invitada pola fundación da que é presidente o ribadense e Membro de Honor da Coral, Cándido Fernández Ledo.
A Polifónica interpretará un programa de música popular baixo o título "Palabras con música" no que se inclúen obras galegas, habaneras, pezas hispanoamericanas, pezas de zarzuela e musicais.
A Coral sairá de viaxe o sábado ás 9 da mañá, visitará Toledo e pernoctará en Linares, para continuar viaxe o domingo a Marbella.

A Coral celebra a Pascua en San Martiño

2011-05-11T06:37:00.000-07:00

Na Semana Santa a Coral cantou a misa de Pascua na Basílica de San Martiño, como xa fixera noutras dúas ocasións.

Despois dos cantos propios da celebración relixiosa, a Coral ofreceu un pequeno concerto de música popular, que resultou moi emotivo e que o público que enchía a Catedral aplaudíu con entusiasmo.

Dende a Coral amosamos o noso agradecemento pola afectuosa acollida, un ano máis, tanto á organización coma ó público.

Hoxe, a Coral estrea a obra "Dies Irae"

2011-04-16T01:58:00.000-07:00

Ás 8:30 da tarde, na Igrexa Parroquial, a Coral poñerá o remate ó Pregón da Semana Santa de Ribadeo.

Además das obras "Amazing Grace" e "Coral da Pasión", a Coral interpretará, xunto á Orquestra de Corda do Conservatorio Profesional de Música de Lugo, o motete "Ave Verum" e estreará a obra inédita "Dies Irae" composta por Eli Gª-Bouso, compositor e membro da Coral.

Aunque xa cantara algunhas panxoliñas deste autor, esta é a primeira obra para coro e orquestra de Gª-Bouso que a Coral interpreta.

A Coral empezou xa a ensaiar outra obra deste autor, unha cantata profana para solista, coro e orquestra, a estrear a medio plazo.

A Coral ultima os ensaios para a estrea da obra "Dies Irae"

2011-04-05T14:04:00.000-07:00

O venres a Coral desprazarase a Lugo para ensaiar, xunto coa orquestra do Conservatorio, a obra "Dies Irae", inédita ata agora e que será estreada no Pregón de Semana Santa de Ribadeo, o próximo día 16 de abril.

A obra, para coro mixto e orquestra de corda, foi composta polo compositor e coralista, Eliseo Gª-Bouso.

XVI Festival de Paxoliñas

2011-02-28T13:00:00.000-08:00

Coral Polifónica de Ribadeo e Coro Sagrado Corazón

Igrexa Parroquial de Ribadeo

Nadal 2010

ANO 2011

2011-01-30T08:15:00.000-08:00

A coral está a preparar xa a obra que, en rigurosa estrea, interpretará no Pregón de Semana Santa, o 16 de abril.

Trátase da peza "Dies Irae" para 4 voces e orquestra, composta por Eli Gª-Bouso, compositor afeccionado e membro da coral, que a Polifónica interpretará acompañada pola Orquestra de Corda do Conservatorio de Música de Lugo.

XVI Festival de Panxoliñas: remate do ano 2010

2011-01-30T07:49:00.000-08:00

O pasado día 26 de decembro, na Igrexa Parroquial de Ribadeo, as corais "Airiños de Caranza" de Ferrol, "Villa Blanca" de Luarca e a Coral Polifónica, entoaron cantos de nadal, clásicos e tradicionais, xunto a outros máis modernos, dando así forma ó XVI Festival de Panxoliñas, que marcou tamén o remate musical do ano 2010.

O público, que enchía totalmente a Igrexa, aplaudiu tódalas interpretacións con entusiasmo, destacando entre elas o tema "La huella" da coral asturiana, cunha pequena artista de 8 anos, e os temas que a coral e o Coro Sagrado Corazón interpretaron conxuntamente. Foron estes: "Vinde galeguiños" con armonización de Eli Gª-Bouso e cunha introdución de gaita interpretada por unha das pequenas coristas, e "Noche de Paz" nunha actualizada versión a 5 voces, ámbalas dúas pezas de estrea. Hai que destacar a posta en escea desta última, interpretada case en penumbra cunhas pequenas candeas acendidas, que remarcaba aínda máis a fermosura e emotividade da música de F. Gruber.

Próximo concerto de Panxoliñas

2010-12-16T13:23:00.000-08:00

O tradicional concerto de Panxoliñas da Coral Polifónica, terá lugar o día 26 de decembro ás 20:15 na Igrexa Parroquial.

Nesta edición as corais participantes serán:

A Coral Polifónica Villa Blanca, de Luarca
A Coral Airiños de Caranza, de Ferrol.
O coro infantil e xuvenil Sagrado Corazón.

CÁNDIDO FERNÁNDEZ LEDO, NOVO MEMBRO DE HONOR DA POLIFÓNICA

2010-12-16T12:17:00.000-08:00

O 21 de novembro, a Coral Polifónica de Ribadeo continuou coa celebración dos actos de Santa Cecilia, Patrona dos Músicos, iniciada o sábado día 13 co concerto ofrecido no Teatro de Ribadeo polo Coro da DelegaÇâo de Águeda da Cruz Vermelha Portuguesa.

O devandito domingo, a Polifónica cantou na misa celebrada na igrexa parroquial á unha da tarde, contando coa colaboración da pianista Carmen Álvarez Lebredo e do Grupo de Música de Cámara "Arco-Vento".

Despois da misa, ás dúas e media aproximadamente, tivo lugar unha comida de irmandade no Parador de Turismo, durante a cal foi nomeado Cándido Fernández Ledo como novo "Membro de Honor da Coral Polifónica de Ribadeo". O sr. Fernández Ledo, ribadense afincado en Marbella desde hai uns 38 anos, é entre outras cousas, Presidente da Fundación José Banús Masdeu y Pilar Calvo y Sánchez de León. Grazas á sua intervención a Coral de Ribadeo actuou en Marbella nos anos 2003 e 2009, e estaba previsto que volvese a cantar no 2010, aínda que esta nova actuación foi postergada para o vindeiro ano.

Iniciou o acto o Presidente da Polifónica, saludando ós asistentes e continuando co nomeamento de Membro de Honor propiamente dito, mediante a lectura da acta donde se recolle o acordo da Directiva da Coral para o nomeamento do presente acto e facendo unha semblanza do homenaxeado, destacando as virtudes e os motivos polos que sería nomeado Membro de Honor.

Tomou o relevo o sr. Fernández Ledo, pronunciando unhas sentidas palabras de gratitude cara a Polifónica, resaltando as virtudes desta e destacando que non a levou a Marbella só por ser de Ribadeo, senón por ser unha boa coral, de calidade máis que demostrada. Rematou o acto coa entrega do artístico pergamino (realizado á man, nunha grande parte polo tenor Maximino Aramburu Mejeras) que foi lido e entregado polo Secretario da Coral. De seguido, o Presidente da Polifónica impuxo a Cándido a insignia de ouro da Coral, que só posúen os seus membros de honor.

Logo de maneira máis desenfadada, viñeron os agradecementos e agasallos ós colaboradores da Directora: a pianista habitual, e os axudantes de dirección de cada corda. Quedou para o final o agasallo feito á Directora, Carmen Rodríguez Cancelo, que continúa á fronte da Polifónica desde que comenzara en 1984, despois do pasamento de Carlos Álvarez Fernández-Cid, e que, coma el, non recibiu nunca, nin recibe, retribución algunha polo seu traballo.

Non podía faltar un par de interpretacións dos coralistas baixo a batuta de Carmen que, despois de rematar esta parte musical, adicou unhas palabras ós coralistas amosando o seu agradecemento polo esforzo dos cantores e destacando a importancia da convivencia de todos os membros da Coral na que sobresae, como non podía ser doutro xeito, o amor á música e, dentro desta, á interpretación polifónica.

Alongouse a tarde cos "Cantarines" típicos das celebracións familiares e de amigos en Ribadeo, que puxeron o punto final á celebración da Patrona dos Músicos neste ano 2010 por parte da Coral Polifónica de Ribadeo.

O Concerto do Coro da Cruz Vermella de Águeda abriu os actos de Sta. Cecilia

2010-11-18T14:28:00.000-08:00

Ás 9 da noite, no Teatro de Ribadeo, o coro da Cruz Vermella de Águeda, ofreceu un concerto amplo e variado. Dirixidos por Sergio Brito e coa colaboración da pianista Teresa Raminhos, as 45 voces interpretaron un total de 13 pezas, dende as relixiosas ás propias do seu folclore sen esquecer a habanera e o bolero.

O público aplaudiu con entusiasmo premiando o esforzo vocal e o bo facer co que interpretaron cada unha das pezas. Especialmente aplaudidas foron os espirituais, o fado "Barco Negro", adicado á Directora da Coral Ribadense, a habanera "Blanco Velero" e o bolero "Piel Canela.

O remate do concerto púxoo a interpretación da habanera "Yo quiero ser marinero" conxuntamente coa Coral Polifónica, amosando así a amizade e unión que a música é capaz de conseguir.

A Coral regalou ó coro portugués unha cerámica de Sargadelos co faro da Illa Pancha e recibiu tamén unha preciosa cerámica portuguesa e o "Cancioneiro de Águeda" cunha adicación persoal á Coral.

Os coralistas portugueses disfrutaron da fin de semana e amosaron o seu agradecemento ós membros da coral ribadense por tódalas atencións recibidas que non foron senón unha xusta correspondencia ás que eles lle dispensaran á Coral na primavera pasada.

FESTIVIDADE DE SANTA CECILIA

2010-11-09T14:40:00.000-08:00

O 13 de Novembro, no Teatro de Ribadeo, ás 21 horas, concerto:

Coro da Cruz Vermella de Águeda (Portugal)

coa colaboración da Coral Polifónica de Ribadeo. Ámbalas dúas corais cantarán conxuntamente para rematar o concerto a habanera "Yo quiero ser marinero".

O 21 de Novembro:

Misa na Igrexa Parroquial á 1 da tarde.

Xantar, no Parador de Turismo de Ribadeo, durante o que se levará a cabo o nomeamento, como novo Membro de Honor da Coral, a Cándido Fdez. Ledo, en recoñecemento ó seu traballo desinteresado e agarimoso pola coral, que se viu reflectido en dúas actuacións que a Coral celebrou en Marbella e a onde se volverá desplazar no próximo verán.

OUTONO 2010

2010-11-09T14:08:00.000-08:00

Empezamos o outono actuando en Oleiros o día 25 de setembro, invitados polo coro de Santa María de Oleiros, no día en que se celebraba o pasamento da cantante Ana Kiro, a quen a coral adicou a primeira das súas interpretacións: "Amazing Grace". Compartimos escenario coa coral anfitriona e coa coral "Brisas do Mar" de Corme, cuxos directivos invitaron á Coral a actuar nesa vila mariñeira o próximo verán.

O pasado día 31 de outubro, actuouse no auditorio Oscar Pereiro de Mos (Pontevedra), dentro do festival " V Xuntanza Coral de Canto Galego O Son dos Cantares", adicado á música galega, xunto ás corais Orfeao Dr. Joao Antunes de Condeixa-a-Nova (Portugal), Xan Mella de Baio (A Coruña), Orfeón de Trives (Ourense) e a Coral anfitriona O Son dos Cantares.

REMATA O VERÁN

2010-09-04T13:28:00.000-07:00

O sábado, 14 de agosto, no Cantón, a Coral participou no XX aniversario do grupo de rock ribadense Mallory. Dúas pezas do propio grupo e unha de Barón Rojo, armonizadas por Eli García-Bouso, foron as que interpretaron conxuntamente.

Esta actuación, coa que tanto disfrutamos e que se nos fixo moi corta, recordounos a que fixéramos co grupo vasco Tirri Tarra, fai xa tres anos, e que tan bo recordo deixou tanto nos coralistas como no público.

Foi esta unha nova oportunidade para poder interpretar outro tipo de música totalmente distinta á que habitualmente interpretamos e amosar a versatilidade da Coral sempre aberta a novas experiencias musicais, poñendo de manifesto esa fusión de idades, gustos e estilos que só a música é capaz de conseguir.

"NORABOA MALLORY" e grazas.

O XVI Festival de Habaneras, organizado conxuntamente polo Concello e a Coral, foi, un ano máis, un rotundo éxito. As corais " Lembranzas de Sta. Cruz" de Oleiros ( A Coruña), URECA de Vigo e a C.P. de Ribadeo interpretaron as súas habaneras e boleros ante un auditorio totalmente abarrotado de público, que agradeceu con efusivos aplausos as súas actuacións.
Un fermoso decorado, realizado pola coralista Marta Castelao, creou o ambiente axeitado ás características do festival.
A habanera "Yo quiero ser marinero ", interpretada conxuntamente polas 3 corais e o público, puxo o remate esperado a esta decimosexta edición.

COMENTARIO ÁS ÚLTIMAS ACTUACIÓNS

2010-08-12T11:50:00.000-07:00

O concerto realizado, como remate do XXI curso de verán da Fundación Luis de Trelles, no Teatro de Ribadeo foi un éxito. O público, na súa maioría cursillistas de distintos lugares de España, aplaudiu con entusiasmo cada peza do programa, composto nesta ocasión de música galega. Ó rematar o concerto, os organizadores do curso, agradecidos á Coral, fixéronlle un "pasillo" e foron aplaudindo a saída de todos e cada un dos coralistas, aplausos que se prolongaron na rúa e que sorprenderon gratamente os membros da Coral.

A actuación do pasado 7 de agosto, no Auditorio de Cabanela, dentro da Semana Náutica que organiza o Club Náutico de Ribadeo, estivo adicada a cantos do mar e habaneras.

As circunstancias nas que se desenrolou o concerto non foron as máis idóneas, xa que o alboroto dunha parte do público e a continua entrada de xente no recinto (totalmente vallado) impediron que, tanto os coralistas como o público que desexaba escoitar, poideran disfrutar coa música. A Coral, a pesar dese ambiente pouco axeitado e desas mostras de falta de consideración á súa presenza, continuou o concerto como estaba previsto, amosando a súa profesionalidade e agradecendo ó público (moito fóra do recinto) o seu apoio e aplausos.

O SÁBADO, 3 DE XULLO, NO TEATRO

2010-06-27T10:34:00.000-07:00

A Coral actuará o próximo sábado, 3 de xullo, ás 10 da noite no Teatro de Ribadeo, dentro do XXI Curso de Verano Fundación Luis de Trelles.

O concerto estará centrado, nesta ocasión, na música galega.

Dende as últimas actuacións en abril, en Ribadeo, Avilés e Portugal, a Coral participou, en Monforte, no concerto do 50 aniversario da Coral Renfe, e no concerto celebrado na parroquia de Arante con motivo da festa das Cruces, en A Ponte, concertos os dous moi aplaudidos polo público e moi satisfactorios para os coralistas.

Rematan, con este concerto, as actuacións da Coral neste primeiro semestre, para dedicar este mes de xullo ós ensaios cos que se prepararán as actuacións de agosto: a destacar, a colaboración co grupo de rock local, Mallory, e o Festival de Habaneras.

CONCERTO EN ÁGUEDA (PORTUGAL)

2010-04-27T12:09:00.000-07:00

O sábado, 17 de abril, a Coral participou no Concerto Comemorativo do 33º Aniversario da Delegación de Águeda da Cruz Vermella, xunto ó Coro de dita agrupación e o Orfeâo de Paços de Ferreira.

O concerto resultou do agrado do público asistente que aplaudiu especialmente a "Ruada de Chamosa", "El cóndor" e o "Coro de barquilleros". A última peza do programa "O vira do Minho", adicada especialmente ó público, foi seguida con palmas por este. A Coral cantou para rematar, a petición do director anfitrión Sergio Brito, "Yo quiero ser marinero" habanera que xa nos escoitara interpretar nalgunha ocasión e que lle gusta especialmente.

A Coral quere agradecer, dende este espacio, a magnífica acollida e as atencións constantes que os responsables do Coro da Cruz Vermella nos dedicaron durante a estancia en Águeda e transmitir o sentir agradecido de tódolos coralistas que disfrutaron dunha magnífica fin de semana cultural.

O Coro portugués actuará na nosa vila probablemente na Festividade de Santa Cecilia, mantendo así esta amizade musical que nos une.

A CORAL, DE NOVO EN PORTUGAL

2010-04-12T12:15:00.000-07:00

Despois do concerto de Semana Santa, que a Coral ofreceu o pasado 27 de marzo, acompañada da Orquestra de Cámara de Ribadeo, e da participación no XIX Festival de Habaneras de Avilés, o pasado Domingo de Pascua, a colectividade prepárase para a próxima actuación: será en Águeda (Portugal) o vindeiro sábado, 17 de abril. Alí a Coral actuará xunto a dúas agrupacións portuguesas, invitada polo Orfeâo de dita cidade, co gallo do 33 aniversario da Cruz Vermelha desa vila.

Unha nova oportunidade de visitar o país veciño e de compartir experiencias musicais.

COMEZANDO O 2010

2010-03-05T09:42:00.000-08:00

Actuación no Pregón de Antroido 2010

Despois do xa tradicional Concerto de Panxoliñas (coas corais polifónicas de Burela, Bella Helenis de Pontevedra e coro xuvenil Sagrado Corazón), co que rematou o ano 2009 e o concerto en San Tirso de Abres en xaneiro, co que comezou o 2010, a Coral actuou no Pregón do Antroido, o sábado 13 de febreiro, no Teatro de Ribadeo.

Vestidos axeitadamente para a ocasión, ofreceron un breve concerto de seis pezas, entre as que destacaron as renacentistas "Hoy comamos y bebamos", acompañados polo Grupo de metais da Escola Municipal de Música e "Contrapunto bestiale", cunha orixinal posta en escea, ademais da estrea de "Ruada de Chamosa". Un concerto que, segundo o público, fíxose moi corto.

A Coral está a preparar xa o próximo compromiso musical: o Pregón da Semana Santa de Ribadeo, o vindeiro 27 de marzo, no que actuará acompañada pola Orquestra da Escola Municipal .

A FUNDACIÓN INICIATIVAS 21 RECOÑECE O TRABALLO DA NOSA DIRECTORA

2009-12-18T09:18:00.000-08:00

A Fundacíón "Iniciativas 21" de Santiago de Compostela vén de facer pública a V Edición dos premios "21 mulleres galegas, 21 historias cotiás", sendo a nosa directora, Mª Carmen Rodríguez Cancelo, unha das elixidas.

Con estes premios, a Fundación quere recoñecer o traballo e a traxectoria vital de 21 mulleres galegas, pertencentes a sectores diversos da sociedade, que dalgún xeito desempeñan ou desempeñaron un labor importante para a sociedade.

O acto de entrega dos devanditos premios terá lugar o próximo domingo, 20 de decembro, ás 12 horas no Teatro Colón Caixa Galicia de A Coruña.

Tódolos coralistas nos felicitamos por este recoñecemento e amosámoslle, á nosa directora, o noso agarimo.

CELEBRACIÓN DE SANTA CECILIA

2009-11-28T11:26:00.000-08:00

O pasado domingo, 22 de novembro, a Coral celebrou o día da súa patrona, Santa Cecilia, cunha misa na Igrexa Parroquial na que se interpretaron, entre outras obras, "Te Deum" de Ennio Morricone e o espiritual "I'm gonna sing".

A continuación, coralistas, membros de honor, familiares, amigos e representantes do Concello asistiron a unha comida no Parador de Turismo, no transcurso da cal se homenaxeou á súa directora, Mª Carmen Rodríguez Cancelo, ó cumplírense 25 anos na dirección da Coral. Unha medalla por parte do Concello e un broche de ouro, zafiros e rubíes coa insignia da Coral por parte dos coralistas foron os agasallos que, entre outros máis emotivos, se lle fixeron á directora, quen, pola súa parte, agasallou tamén a cada un dos coralistas cun pequeno detalle, en lembranza deste día.

A Coral ultima xa os preparativos para o concerto que ofrecerá, o próximo 6 de decembro, no Teatro Cidade de Marbella, do que reproducimos o cartel anunciador:

actuación en León. Viaxe a Marbella

2009-11-03T10:32:00.001-08:00

Despois da actuación en León
A CORAL POLIFÓNICA PREPARA A VIAXE A MARBELLA
Antes celebrarán a festividade de Sta Cecilia.

O pasado día 24 de outubro, a Coral participou no Encontro Coral que, organizado pola Coral Torreblanca, se celebrou na Igrexa de San Martín, no centro da capital leonesa.
Acompañaron á Coral, a Polifónica Bembibrense e a anfitriona Coral Torreblanca.
O moitísimo público que se deu cita na Igrexa, a pesares doutros importantísimos concertos que a mesma hora se estaban a celebrar, aplaudiu con entusiasmo tódalas interpretacións, que conformaron un concerto moi variado, tanto polas pezas elixidas por cada unha das corais como pola posta en escena das mesmas.
A Coral de Ribadeo, que pechou coa súa actuación o Encontro, interpretou un programa de cinco pezas, similar ós que vén ofrecendo nestas xuntanzas corais. Foron especialmente aplaudidas a pandeirada, “Te quiero” e o “Coro de barquilleros”. Ó remate tódalas corais interpretaron xuntas o tema “Viva la montaña”.
A Coral , que foi moi felicitada por coralistas e público, aproveitou o día seguinte para visitar a cidade. Posiblemente regrese á capital leonesa no vindeiro ano, a cantar unha misa na Catedral, aceptando a invitación feita polo director leonés.

VIAXE A MARBELLA
Para os próximos días 5,6 e 7 de decembro está prevista a viaxe da Coral a Marbella, que actuará no teatro Cidade de Marbella, o domingo, día 6, ás 8 da tarde.
A Coral está a preparar xa este concerto no que, baixo o título “Camiños de estrelas” en referencia ó Xacobeo 2010, se interpretarán 14 temas, de música clásica e relixiosa, popular galega, temas hispanoamericanos e zarzuela.
O concerto está patrocinado pola Fundación José Banús, que preside o ribadense Cándido Fernández Ledo e forma parte da programación cultural da cidade de Marbella.

ACTUACIÓN EN LEÓN

2009-10-18T10:29:00.000-07:00

O próximo sábado, 24 de outubro, a Coral actuará na cidade de León, invitada pola Coral Torreblanca.

O concerto terá lugar na igrexa de San Martín, ás 8.30 da tarde.

Acompañarán á Coral de Ribadeo, a Coral anfitriona e a Coral de Bembibre.

Próximas actuacións

2009-09-16T11:20:00.000-07:00

A Coral viaxará o próximo sábado, 19 de setembro, a Gijón, para actuar na parroquia de San Nicolás de Bari (El Coto) ás sete e media da tarde.

A Coral cantará xunto ás corais de Cangas e de Portugalete.

A actuación en León, prevista para o 17 de outubro, trasládase ó sábado seguinte, 24 de outubro.

XV festival de habaneras "Ría de Ribadeo"

2009-09-16T11:14:00.000-07:00

O XV Festival de Habaneras “ Ría de Ribadeo”, que se celebrou na tarde do pasado día 29 de agosto, volveu ser, un ano máis, todo un éxito e unha cita esperada e de referencia no verán ribadense.
O Auditorio volveu quedar pequeno para acoller ó moito público que, con máis dunha hora de antelación, agardaba a que se abrira o recinto.
As corais “Torreblanca” de León, “San Félix” de Lugones e a Coral Polifónica de Ribadeo interpretaron dende as habaneras tradicionais como “El abanico”, “La reina del placer”, “Con sabor tropical” a outras máis locais como “Rosina” ou a ribadense “El Peregrino”, sendo especialmente aplaudidas as cancións hispanoamericanas “Alma, corazón y vida”, “Canción con todos” e sobre todo “El cóndor pasa”.
Como remate do festival , e despois da entrega de obsequios de mans do alcalde do Excmo. Concello, as tres corais interpretaron, coa participación do público, a esperada habanera “Yo quiero ser marinero”, un final xa tradicional, dende hai uns anos, pero sempre emotivo e cálido.
A Coral, organizadora deste festival, síntese satisfeita e agradecida pola acollida que ano a ano ten este certame, a pesares dos inevitables problemas que supón a falta de espacio e a imposibilidade de ofrecer máis comodidade a tanto público afeccionado ás habaneras.

ZARZUELA E OUTRAS MÚSICAS

2009-09-02T08:54:00.000-07:00

De éxito rotundo, a xulgar pola entrada, acollida e crítica do público, se pode calificar o concerto que a Coral ofreceu o día de san Roque no Teatro de Ribadeo.
Despois de máis de dúas décadas sen actuar nese entrañable local, que vira nacer á Coral no ano 1955, o Teatro recobrou con esta actuación a vitalidade musical que outrora tivera como centro da vida cultural e musical ribadense.
O concerto, coa música popular como fío conductor, dividiuse en dúas partes: a primeira, que se abriu coa danza francesa do século XV "Tourdion", estivo composta por pezas de música galega, portuguesa e cubana; a segunda parte estivo adicada a zarzuela, na que se cantaron cinco pezas deste popular xénero musical ademais do chotis "Madrid".
Se a primeira parte foi moi aplaudida, os aplausos e vítores do público redobráronse o comezo da segunda, e así ata rematar o concerto.
A Coral, nesta ocasión case ó completo, con 50 voces no escenario, ofreceu ó público o resultado do seu traballo no que se notaba o seu entusiasmo e amor a música coral,e o público recoñeceu a súa entrega, esforzo e bo facer.
O concerto, que contou coa participación do Coro Sagrado Corazón na interpretación, sempre emocionante, de Halelujah de Leonard Cohen,quedará no recordo dos coralistas polo cheo absoluto do teatro, pola interpretación e,sobre todo, pola cálida acollida dun público entregado e emocionado.

Luz Negra: Tirri Tarra e Coral Polifónica de Ribadeo

2009-08-06T12:21:00.000-07:00

Este é un fragmento da peza "Sin Palabras" que forma parte do video que recolle o concerto ofrecido en Ribadeo, o 24 de agosto de 2008.

"Luz Negra", obra á que pertence este fragmento é unha composición orixinal de Sergio Zurutuza

PRÓXIMAS ACTUACIÓNS

2009-07-11T11:46:00.000-07:00

AGOSTO:
Día 16: Ribadeo. Concerto de verán.
Día 22: Oleiros (A Coruña).
Día 29: Ribadeo. Festival de Habaneras.

SETEMBRO:
Día 8: Ribadeo. Misa da Patrona.
Día 19: Gijón.

OUTUBRO:
Día 17: León.

ACTUACIÓNS EN VALDOVIÑO E VIGO

2009-07-11T11:25:00.000-07:00

A Coral pechou este primeiro semestre do ano coas actuacións en Valdoviño, o 13 de xuño, e en Vigo, o día 27, ademais da misa de Corpus, o día 14 en Ribadeo, tal e como estaba previsto.

O concerto en Valdoviño, enmarcado dentro da XXII Mostra de Canción Coral, foi un éxito, tanto pola satisfación dos propios coralistas como pola acollida do público a cada unha das pezas interpretadas e as moitas felicitacións recibidas ó remate da actuación. A Mostra contou coa participación doutras catro corais: Baión, Viana do Bolo, San Vicente de la Barquera e a coral anfitriona.

No auditorio do Centro Cultural Caixanova de Vigo, a Coral compartiu escenario coas Corais de Bueu e URECA de Vigo. organizadora do Encontro.As Corais ofreceron un repertorio case exclusivamente en galego e remataron cantando conxuntamente dúas pezas.

Remata este semestre con nove actuacións e a Coral está xa a preparar as próximas citas para o mes de agosto e para o outono.

CELEBROUSE O II FESTIVAL CORAL XUVENIL

2009-06-07T01:55:00.000-07:00

Con grande éxito, celebrouse, o pasado 23 de maio, o II Festival Coral Xuvenil, no Auditorio Municipal, organizado pola Coral Polifónica de Ribadeo, co patrocinio de FECOGA e a colaboración da Delegación de Cultura do Concello de Ribadeo.
Os coros de o Freixo (Outes-Noia) e Baión (Vilanova de Arousa), xunto ó anfitrión, o coro Sagrado Corazón, ofreceron ó público repertorios diferentes que conformaron unha variada mostra de cantos populares e modernos, a capella e con acompañamento instrumental, ós que, o numeroso público asistente, respondeu con cálidos aplausos.
O festival, presentado por Marta Castelao (membro da Coral Polifónica), contou tamén coa proxección de imaxes que acompañaron a cada unha das pezas interpretadas (traballo informático realizado pola profesora Begoña Sanjurjo) e que deron ó festival outra perspectiva.
Ó remate das 15 pezas interpretadas en total, a directora da Coral Polifónica e do coro Sagrado Corazón entregou, os coros invitados, unha peza de cerámica de Sargadelos, alegoría da árbore da vida.
O festival rematou coa interpretación conxunta dos tres coros da canción “Adelante”.
Os obxectivos desta xuntanza coral xuvenil quedaron totalmente alcanzados, tanto no que se refire a resposta do público como ó feito musical en si mesmo.
Queremos agradecer a todos os que colaboraron para que este festival puidera realizarse e desexamos que teña continuidade nos vindeiros anos polo futuro da música coral

II FESTIVAL CORAL XUVENIL

2009-05-20T10:16:00.000-07:00

O próximo sábado, 23 de maio, ás oito da tarde, no Auditorio municipal de Ribadeo, celebrarase o “II Festival Coral Xuvenil”.
Patrocinado por FE.CO.GA. e organizado pola Coral Polifónica, coa colaboración do Concello de Ribadeo, contará nesta ocasión co Coro Xuvenil Cantigas do Castro de Baión (Vilanova de Arousa), Coral Xuvenil Solpor, de Outes (A Coruña) e o Coro Sagrado Corazón, anfitrión da xuntanza e que é colaborador e canteira da Coral Polifónica.
O repertorio que ofrecerán inclúe cancións populares galegas, temas de películas e mesmo cancións de música moderna.
Este festival pretende amosar ó público en xeral, a música feita polos rapaces, valorando esta actividade como unha oferta cultural máis e non cinguida exclusivamente ó ámbito escolar, e intentando fomentar nos xóvenes o gusto pola música coral para que sexan eles os continuadores desta actividade musical tan arraigada na nosa cultura.

ACTUACIÓNS EN MAIO

2009-04-26T12:23:00.000-07:00

- 2 de maio: no Teatro de Ribadeo, a Coral participará no acto de presentación do libro "Con Leopoldo Calvo-Sotelo en Ribadeo", acto que forma parte da homenaxe que o pobo de Ribadeo lle vai ofrecer neses días. A Coral pechará o acto cun pequeno concerto de habaneras no que estreará dúas obras preparadas especialmente para esta ocasión.

- 10 de maio: no Teatro Pastor Díaz de Viveiro, a Coral está invitada ó acto oficial de conmemoración do XXV aniversario da Coral Polifónica Alborada, en lembranza do concerto de presentación de dita Coral que fora apadriñada, no seu día, pola Coral Polifónica de Ribadeo.

SEMANA SANTA

2009-04-23T12:28:00.000-07:00

A Coral rematou as súas actuacións de Semana Santa co concerto e misa de Pascua, ofrecidos na Basílica de San Martiño o Sábado Santo.

A esta actuación hai que engadir as realizadas en Ribadeo: o concerto no Pregón e a misa do Xoves Santo, como xa é costume. O repertorio ofrecido, exclusivamente relixioso, viuse ampliado coa estrea do espiritual "I'm gonna sing".

Tres novas voces femininas se incorporaron á Coral, voces que se veñen a sumar ás oito que o fixeron ó longo dos dous últimos anos, todas elas procedentes do Coro Sagrado Corazón.

PRÓXIMAS ACTUACIÓNS

2009-03-15T02:51:00.000-07:00

Ribadeo:

Pregón de Semana Santa , 4 de abril

Misa do Xoves Santo , 9 de abril

San Martiño:

Misa de Pascua e Concerto , 11 de abril

Valdoviño:

Concerto , 13 de xuño

Vigo:

Concerto , 27 de xuño

A CORAL APADRIÑA UNHA NOVA CORAL LUCENSE

2009-02-03T11:34:00.000-08:00

O pasado venres, 30 de xaneiro, a Coral Polifónica de Ribadeo ofreceu un concerto no Salón Rexio do Círculo das Artes de Lugo, concerto que serviu para apadriñar á Coral “Asociación Amigos del Camino de Santiago” da capital.
O acto, presentado por Xulio Xiz e organizado pola “Asociación de Amigos del Camino de Santiago de la Provincia de Lugo”, tivo dúas partes:
Na primeira actuou a Coral Polifónica de Ribadeo, que ofreceu un variado repertorio no que se mesturaban pezas clásicas como Tourdion e Panis Angelicus con outras como Negro Bembón ou Moon River, sen esquecer as xa emblemáticas da coral como Te quiero ou Yo te diré. A coral estreou, nesta ocasión, a peza galega “Lela”.
Na segunda parte actuou a coral anfitriona, dirixida por Miguel Basanta, profesor que foi da escola de música de Ribadeo estes dous últimos anos. A nova coral lucense, que comezou a súa andaina musical no ano 2006, ofreceu un concerto centrado en pezas renacentistas para rematar con dúas populares.
A continuación, fixéronse, por parte de ámbolos dous presidentes, os acostumados intercambios de obsequios e as mutuas palabras de agradecemento soaron na rexia sala.
Hai que sinalar que esta foi a primeira vez que a nosa coral actuaba neste prestixioso escenario. O “Encuentro de Corales del Camino de Santiago” rematou coa interpretación conxunta de “Benedicat vobis”, baixo a dirección de Mª Carmen Rodríguez Cancelo, directora da Coral polifónica de Ribadeo.
A coral foi felicitada efusivamente, tanto pola súa actuación como polo programa escollido, o que a anima para seguir por este camiño, mesturando o disfrute coa esixencia dos ensaios e o compromiso persoal de cada un dos seus compoñentes.

Memoria do ano 2008

2009-01-10T12:00:00.000-08:00

MEMORIA DO ANO 2008

As actuacións empezaron, para a Coral, en marzo, co Concerto de Semana Santa, acompañados nesta ocasión pola Orquestra de Cámara de Xove. Tras varias conversas, o director da orquestra aceptou a invitación e, despois de 2 ensaios conxuntos, en Xove e Ribadeo, puido levarse a cabo o concerto, satisfacendo así o desexo dos coralistas de volver interpretar o Aleluia do Mesías .As obras interpretadas, clásicas xa dentro do repertorio da coral, adquiriron outros matices: grandiosidade e emotividade na interpretación que trascenderon dende os intérpretes ó público.Ó igual que o ano anterior, o Coro Sagrado Corazón colaborou na interpretación do Panis Angelicus.
Seguiron a este concerto, as actuacións no XVII Encontro Coral de Habaneras de Avilés e a participación na Semana Cultural da Escola de Idiomas de Ribadeo, para a que se escolleu un programa con pezas en alemán, italiano, francés, inglés e portugués.

O mes de maio iniciouse coa actuación en Burela, dentro dos actos do XX Aniversario e Festival das Letras Galegas. O inesperado falecemento de Leopoldo Calvo- Sotelo, obrigou á Coral a preparar, en domingo, unha misa solemne, atendendo ós desexos musicais da familia, desexos que reflectían os gustos de D. Leopoldo, gran melómano e Membro de Honor da Coral. A “Negra sombra”, ó órgano, marcou o inicio do funeral, á que seguiron o Coral da cantata 147, “Réquiem” de Bruno Coulais, un fragmento da Sinfonía do Novo Mundo, “Ave verum corpus” e o Santus e Agnus da Misa Breve de Schubert. Ó remate da cerimonia soou, por expreso desexo da familia, a habanera ribadense “El peregrino”, que fillos e netos tarareaban “sotto voce” mentres abandonaban a igrexa, amosando a súa emoción e agradecemento á Coral que os despedía, en silencio, dende o coro.
Invitada polo Orfeón Logroñés, a Coral actúa o 17 de maio no Auditorio Municipal de Logroño, dentro do XXVI Ciclo de Música Coral, programado, para todo o mes, por Cultural Rioja e o propio Orfeón.

Remata musicalmente maio co I Festival Coral Xuvenil que, patrocinado por FECOGA e organizado pola coral, reúne, no Auditorio, á Coral Xuntanza Xove de Meis e ó Coro Sagrado Corazón.O festival cumpriu con todas as expectativas que del se esperaban: éxito de público, popularización do canto coral dos rapaces e xornada festiva e de convivencia arredor da música. O desexo da Directiva é continuar e mesmo institucionalizar este festival, para que sirva de aliciente ós rapaces e os anime a integrarse nos nosos coros e crear, deste xeito, unha base de futuros coralistas.

O verán, que comezou coa participación no VII Encuentro Coral en Luarca, o 29 de xuño, estivo dedicado a ensaiar, moito máis do habitual, o concerto que a Coral ofrecería co grupo Tirritarra e que marcou, pola súa espectacularidade, o verán musical ribadense. A Coral, nembargantes, non esqueceu outros compromisos: clausurou a Semana Náutica cun concerto no peirao de Porcillán e organizou o XIV Festival de Habaneras “Ría de Ribadeo”.Nun escenario ambientado para a ocasión por Belén e Mariposa Cociña, as corais de Cudillero, Mugardos e Ribadeo deleitaron ó público, que espera ansioso cada ano este festival e que enchía totalmente, como de costume, o Auditorio ribadense. Habaneras, boleros, sons cubanos e mesmo unha milonga soaron a noite de San Roque, evocando nos presentes outros tempos, outras lembranzas e outras paisaxes. A Coral estreou, nesta ocasión, as pezas “Negro bembón” e “ Canción con todos” e soou tamén a milonga “Insomnio”( na voz da solista Gloria Rguez.), con letra de El Viejo Pancho e popularizada no seu día por Carlos Gardel, que fora estreada o ano pasado, con motivo dos actos dedicados ó poeta ribadense.
A asociación “Amigos del Eo” homenaxeou a Coral o 23 de agosto, en virtude dos méritos que a avalaban para este recoñemento: a concesión da Medalla de Ouro do Concello, o nomeamento de “Lucense do Ano 2005”, e o ser considerada como a principal embaixadora artística da Ría ó longo de 53 anos, segundo o consideraron os membros da citada asociación. A Coral sumábase así a unha longa lista de personalidades e colectivos homenaxeados, que se iniciara no ano 1953. Durante a comida, que reuniu no Parador a representantes das 4 vilas do entorno da Ría (Castropol, Figueiras,Vegadeo e Ribadeo), coralistas e amigos, un representante de cada vila glosou os méritos da Coral para ser merecente desta distinción, palabras de eloxio que foron agradecidas polo presidente e directora da Coral e que remataron coa interpretación de 3 pezas: “A despedida”, “Cantar de mozos” e “Yo quiero ser marinero”, escollidas, cada unha delas, especialmente para a ocasión. Antes de rematar o acto, proxectouse unha película do día da inauguración do Monumento ó Gaiteiro, gravada por Carlos Díaz Suárez, documento sonoro que fixo lembrar ós presentes a amigos, veciños e vivencias de moitos anos atrás.
O día 24 de agosto, o grupo Tirritarra, a orquestra SottoVoce e a Coral ofreceron o espectáculo “Luz Negra”, un orixinal concerto de luz e son, no que se uniron o rock sinfónico, a música electrónica e as voces. A iniciativa, que contou co apoio de Caixa Nova e o Concello, culminou un proxecto de longas negociacións e duros ensaios. A expectación xerada ante o concerto, a resposta multitudinaria do público e o disfrute, tanto dos intérpretes como dos espectadores, foron motivos máis que suficientes para calificar o espectáculo de éxito total. Se a esto se unen a experiencia que supuxo para os coralistas unha obra destas características e as relacións de amizade musical que se produciron durante o tempo de preparación, o resultado non puido ser máis fructífero e gratificante.

O outono resúmese en 3 concertos. O primeiro foi a celebración do X Aniversario da Coral Sta. Mª de Cambre, o 8 de novembro, nesta vila coruñesa, onde a coral compartiu escenario, ademais da anfitriona, co grupo coral Oasis, de Anadia (Portugal).
O concerto de Sta. Cecilia , o 22 de novembro, contou, nesta ocasión, coa participación do Coro Sgdo.Corazón e da propia coral.Destacar deste concerto a interpretación do “Himno al vino” que non fora estreado aínda en Ribadeo e que foi coreado polas palmas do público asistente, sobre todo dos rapaces cantores, e que houbo que repetir.Tamén, como é costume, cantouse a misa do domingo 23
na honra da patroa, na que colaborou o grupo Arco-Vento. A esta celebración relixiosa hai que engadir tamén as misas do Xoves Santo, Corpus e da Patrona que son compromisos fixos da coral dende hai moitos anos. Hai que sinalar que o día da Patrona estreouse a obra “Te Deum”, pertencente á película “La misión”.
O ano rematou co XIV Festival de Panxoliñas, na Igrexa Parroquial, no que ó Coro Sgdo. Corazón e á nosa coral uniuse a Coral do Hospital Xeral-Calde, que fixeron, cos seus cantos, máis presente o Nadal. Neste concerto estreáronse as obras “Navidad” de Leopoldo González e “Cantémoslle ó Neno”de Eli García-Bouso, e rematou coa interpretación conxunta dos coros ribadenses do famoso vilancico “El Tamborilero”, acompañado de percusión e piano (coa pianista Carmen Älvarez que acompaña asiduamente á coral).
A Coral agradece, unha vez máis, o apoio de tódalas persoas que seguen o seu traballo, que os acompañan e os animan e valoran as súas desinteresadas colaboracións.

Currículo

2009-01-03T04:38:00.000-08:00

A Coral Polifónica de Ribadeo foi fundada en 1955, o que a converte na decana da provincia de Lugo. No ano 2005 a Polifónica de Ribadeo celebrou, polo tanto, o seu 50º aniversario. Isto deu motivo a que o Concello de Ribadeo, en setembro dese mesmo ano concedese á Coral a “Medalla de Ouro de Ribadeo”, que lle foi entregada nun Pleno Extraordinario celebrado o día 24 de novembro de 2006. Ademais, a Asociación de Radio e Televisión de Lugo concedeulle á Coral de Ribadeo, tamén no mes de setembro de 2005, o premio “Lucense do ano”, que lle foi entregado o día 18 de febreiro de 2006.

Desde o mesmo día da súa presentación estivo dirixida por D. Carlos Álvarez Fernández-Cid, ata 1984, ano do seu falecemento. A partir desa data a dirección atópase baixo a batuta de Dª María del Carmen Rodríguez Cancelo, mestra e profesora de piano titulada polo Real Conservatorio de Música de Madrid.

A Coral conta cun amplo repertorio no que se inclúen obras clásicas, relixiosas e populares, tanto españolas como doutros países, especialmente iberoamericanos. Na actualidade conta cunhas 50 voces mixtas que reflicten, polas súas idades, a tradición, o presente e o futuro.

A Polifónica de Ribadeo apadriñou ás corais lucenses de Viveiro e Sober nos seus concertos de presentación. Realizou actuacións en numerosas vilas e cidades de Galicia e Asturias, e tamén en Astorga (León), Algemesí (Valencia), San Sebastián, Barcelona, Sabadell, Jaén, Marbella, Laredo e Los Corrales de Buelna (Cantabria), Lisboa, Madrid, Valladolid, León, Santa María da Feira (Portugal), Logroño, así como grabacións para radio e televisión. Cabe destacar o concerto ofrecido o 24 de agosto de 2008 no Cantón dos Moreno, en Ribadeo, actuando co grupo vasco Tirri Tarra e a orquestra de corda Sotto Voce, con gran éxito de público e de crítica. Ten, así mesmo, unha cinta magnetofónica grabada en directo no ano 1995, na que se recolle o concerto conmemorativo do 40º aniversario. O 26 de decembro de 2002 presentou o seu primeiro disco compacto, titulado “nos mares da música”.

En diversas ocasións actuou conxuntamente con outras agrupacións instrumentais: Banda Sinfónica Municipal de Música, Grupo de Gaitas “Follas Novas”, Rondalla “Amigos de la Música”, Grupo de Percusión “Chequeré” e Grupo de Música de Cámara “Arco-Vento”, todas elas agrupacións musicais de Ribadeo, así como coa Orquesta de Acordeones “Amanecer”, de La Caridad (Asturias). É de destacar que habitualmente colabora coa Coral a pianista Carmen Álvarez Lebredo.

A Coral Polifónica de Ribadeo, uns humildes intermediarios entre o compositor e o público, dá vida, dentro da súa faceta de afeccionados, á linguaxe musical, co orgullo de saberse posuidora do máis fermoso, expresivo e cercano instrumento musical da natureza: a voz.