Rematamos o ano 2012

A actuación en Baio e o Festival de Panxoliñas puxeron fin a este novo ano musical.

A viaxe a Baio, o día 15 de decembro, serviu para acompañar e homenaxear á coral anfitriona polo seu X Aniversario, actuación na que estivemos acompañados pola Coral de Carballo.

O XVIII Festival de Panxoliñas contou este ano coas corais de Corme e Pontedeume, que acompañaron á nosa coral e ó Coro Sagrado Corazón. As interpretacións conxuntas da Coral e do Coro xuvenil, (unhas 70 voces), foron moi aplaudidas, especialmente a “Suite Comercial Navideña” e o sempre emotivo “Hallelujah”. Puxo o remate o clásico “Noche de paz”, iluminado con pequenas luces que deron máis emotividade á interpretación.

Neste mes de decembro, recibimos á Coral Luigi Bocherini, de Boadilla del Monte (Madrid), que ofreceu un concerto , no Teatro, enmarcado nos actos organizados para celebrar a festividade de Sta. Cecilia. O programa, moi aplaudido polo público, mesturou pezas de polifonía clásica e temas populares españois e hispanos.

Neste último trimestre do ano, temos que destacar tamén as actuacións en Valga (Pontevedra) e en Cudillero, no X Festival de Habaneras, ademais da celebración especial de Sta. Cecilia, que este ano serviu para homenaxear ás irmás Clarisas, cun pequeno e emotivo concerto na Igrexa conventual.

E para concluír o balance deste ano, sinalar estes outros datos:

- 20 actuacións neste ano, 12 en actos celebrados na vila.

- 8 novos coralistas ( 6 deles do Coro Sgdo.Corazón), que conforman unha coral de case 60 voces, aínda que por razóns de estudos, traballo e circunstancias persoais, sexa unha media de 40 voces as que se desprazan habitualmente coa Coral.

-Alta da Coral en Facebook, para que as novas relacionadas coas nosas actividades musicais, sexan coñecidas máis rapidamente por todas aquelas persoas que nos seguen e tamén por aquelas que ata agora non sabían moito de nós.

PRÓXIMAS ACTUACIÓNS DA CORAL

   Mañá, día 2 de novembro, a Coral dará un pequeno concerto no Auditorio municipal, ás 9 da noite, para inaugurar o Congreso de médicos que se celebrará estes días na nosa vila.

 O sábado día 3, a Coral participará no Festival de Habaneras que terá lugar na vila asturiana de Cudillero, onde interpretará catro pezas, mariñeiras e habaneras.

CELEBROUSE O XVIII FESTIVAL DE HABANERAS “RÍA DE RIBADEO”

O sábado, 18 de agosto, no Auditorio municipal, tivo lugar unha nova edición do xa tradicional festival de habaneras. Nesta ocasión foron o “Coro de Oleiros” (A Coruña) e “O Son dos Cantares” de Mos (Pontevedra) os que acompañaron á Coral Polifónica de Ribadeo no escenario.

O público, que dende media hora antes do inicio, xa agardaba nunha longa fila, encheu, como de costume, o Auditorio e disfrutou da variedade dos distintos repertorios e das interpretacións particulares que cada coral fai dos mesmos.

 A nosa Coral, que conta cun público fiel e entusiasta que nos anima e nos segue, foi agasallada  con incesantes aplausos. Nesta ocasión, escollemos habaneras locais e emotivas como “A Despedida” e outras novas e de gran dificultade como “A tu lado”, completando o programa coa alegre canción filipina “Rosas Pandan” ou a intemporal “Te quiero”, na que solista e coro logran transmitir ó público a intensidade dos versos de Benedetti.

 Neste XVIII festival o público, nembargante, botou de menos a habanera “Yo quiero ser marinero”, coa que era costume rematar esta xuntanza coral. Hai feitos que van arraigando na xente ano tras ano e que un non se decata de que xa se converten en costume. E a costume leva á tradición e se a tradición se rompe (aínda que sexa por motivos fundados) hai un certo malestar. Así que a tradición de rematar o Festival de Habaneras coa peza “Yo quiero ser marinero” seguirá mentres haxa festival ou mentres o público non demande un cambio.

Outras actuacións:

Dende a reseña aparecida no mes de abril,  foron, ademais deste festival de habaneras, varias as actuacións que a Coral realizou:

-En xuño, colaboramos cunha pequena actuación nun acto organizado polo Observatorio da Mariña pola igualdade. Tamén participou no citado acto poético-musical, a cantante Uxía Senlle, coa que a Coral tivo o inmenso pracer de interpretar “ Unha noite na eira do trigo” e a habanera “Casiñas brancas”, actuación que pode verse en Youtube.

-En xullo, ofrecemos un concerto baixo o título “A nosa música”, dentro do curso de verán “Arte e Patrimonio na Mariña Lucense” que organizou a USC. Nesta ocasión, e para buscar un repertorio acorde coa temática das xornadas, o programa estivo composto por música galega (con varias pezas de músicos da Mariña) e zarzuelas.

-Xa neste mes de agosto, viaxamos a Corme para participar no “VIII Festival de Habaneras”, onde compartimos escenario coas corais de Culleredo, Pontedeume e Corme. A actuación, na Praza do Pan, foi moi ben acollida polo público que aplaudiu con entusiasmo a boa interpretación da Coral.

Próximas actuacións:

  25 de agosto:        Pregón das festas patronais de Ribadeo

   8 de setembro:     Misa da Patrona

   6 de outubro:       Valga (Pontevedra)

 27 de outubro:       Boadilla del Monte (Madrid)

           novembro:   Misa de Santa Cecilia

           decembro:   Baio (A Coruña)

                              Ribadeo (Festival de Panxoliñas)

A Coral comezou a temporada de concertos do 2012

En Lugo, o pasado venres, 23 de marzo, a Coral ofreceu un concerto xunto coa Orquestra de Corda do Conservatorio Profesional de Música, no Auditorio do Centro.
Este concerto devolveu a visita que a citada orquestra ofrecera en Ribadeo, na Semana Santa de 2011, para a estrea da obra "Dies Irae" de Eli García-Bouso.
A Coral interpretou, xunto a Orquestra, esta obra e "Ave verun" e completou o programa con dúas pezas profanas e tres relixiosas.
Destacou a interpretación de "Hallelujah" de Leonard Cohen pola beleza da peza en si mesma e pola versión, adaptada a Coral, na que as voces xuvenís van creando dende o comezo un clima de emotividade que contaxia a interpretación xeral.
A Coral foi felicitada polo equipo directivo do Centro que suxeriu a posibilidade de repetir esta colaboración con outro concerto noutro local da cidade, polo que ambas as dúas agrupacións seguirán en contacto.


En Ribadeo, a Coral participou, como xa vén sendo habitual, nos actos da Semana Santa, concretamente no Pregón do pasado día 31 de marzo e na Misa do Xoves Santo.
Destacamos destas actuacións o Pregón, no que a Coral estivo acompañada polo grupo Arco-Vento, na interpretación de "Quando corpus morietur" do Stabat Mater de Pergolessi, e polo Coro Sagrado Corazón que interpretou coa Coral "Panis angelicus" e Hallelujah" con cuxa interpretación volveron emocionar o público que despediu con incesantes aplausos ás dúas agrupacións.

PRÓXIMAS ACTUACIÓNS:

AVILÉS: 6 de abril, Festival de Habaneras
POLA DE SIERO : 21 de abril
MEIS (Pontevedra) 29 de abril

XVII Festival de Panxoliñas

XVII Festival de Panxoliñas
Coral Polifónica de Ribadeo e Coro Sagrado Corazón
Igrexa Parroquial de Ribadeo
Nadal 2011

Un concerto SOBRESAÍNTE

Rematou o ano 2011 e fíxoo, como de costume, co Festival de Panxoliñas, este xa na XVII edición.
Acompañaron á coral, nesta ocasión, as corais "A Pombiña" de Pedroso-Narón, a Coral de Valdoviño e o Coro Sagrado Corazón (que vén de gañar o 1º e 3º premios nas categorías infantil e xuvenil no Certame de Panxoliñas de Escolas Católicas en Santiago).

A Coral e o Coro tiñan preparado un concerto especial, como veñen sendo sempre estes concertos de panxoliñas, e as expectativas cumpríronse aínda por riba do esperado.
Os temas "Cantémoslle ó Neno, Happy Christmas e o bolero de Navidad" pero sobre todo as estreas da "Suite Comercial Navideña" (que repasa os jingles de famosos anuncios navideños) e o "Hallelujah" de Leonard Cohen (coas voces fermosas e emotivas das rapazas Carmen Rodríguez e Mercedes Awad) puxeron sorrisos e bágoas, tanto no público como nos coralistas (80 voces entre as da Coral e o Coro).

O cansancio dos últimos ensaios, acentuado nestas datas, sobre todo por parte dos coralistas máis novos cos exámenes escolares, merecen a pena a xulgar pola satisfacción que todos experimentamos tanto pola interpretación como pola emoción que soubemos transmitir ó público que nos acompañou e que cos seus aplausos e felicitacións puxeron máis calor ás nosas voces nunha fría noite de Nadal.
Felicidades a todos os coralistas que fixeron posible este fermoso concerto e graciñas a todos os que nunha ocasión máis nos acompañastes para vivir e soñar a música.

Cun doce canto de Paz.

Feliz 2012

FESTIVIDADE DE SANTA CECILIA

Despois dunha parada periodística ou bloguística, que non musical, reanudamos a información sobre a nosa coral.
Foron estes dous meses de ensaios ininterrumpidos desde o último comunicado, alá no mes de setembro.
A misa da patroa puxo fin a un verán ateigado de actuacións, todas elas musicalmente satisfactorias e mesmo sobresaíntes e iniciou un outono tranquilo en canto a actuacións, dedicado a preparar o Festival de Panxoliñas e as actuacións en La Caridad do pasado día 19 de novembro, e en San Cibrao, o próximo día 8 de decembro.




Mañá día 27 de novembro, a Coral celebrará a festividade da Patroa da música con unha misa, á 1 da tarde, na Igrexa Parroquial e a comida que reunirá, no Parador de turismo, a preto dun centenar de persoas: coralistas, familiares, amigos, Membros de Honor e representantes do Concello.
Este ano non foi posible contar co concerto coral que tradicionalmente precedía a esta celebración, a pesar da veintena de corais (de distintas comunidades) coas que a directiva contactou.
Esta espera fixo que a Coral tivera que renunciar a 2 actuacións: en Santiago e no Festival de Habaneras de Cudillero.